82年-雞

骨力骨力勤趁錢　　平平凡凡渡日子
歡歡喜喜上福氣　　快快樂樂過新年
初一歇睏到初四　　初五雞啼來開市
雙全紅茶祝福汝　　無煩無惱食百二

83年-狗

紅茶伯仔貼告示　　今年猶原老規矩
歇睏四日去拜年　　初五開市好時機
紅茶伯也有講起　　定來食茶會卡水
朋友相招鬥支持　　健康快樂笑瞇瞇

84年-豬

一日無君天下亂　　一日無茶心頭煩
勸恁提早入幾罐　　毋驚無食喙乾空
初一歇睏連五工　　初六開市新希望
茶友相招來交觀　　人勇茶芳是雙全

85年-鼠

離鄉背井拼趁錢　　回南轉北來團圓
初一歇睏到初四　　初五開市好時機
雙全紅茶好氣味　　茶友攏總有合意
食茶身材會健美　　相招開講真趣味
紅茶伯也祝福汝　　錢鼠添財過好年

86年-牛

春天食茶心花開　　夏天食茶降火氣
秋天食茶親像詩　　冬天食茶好氣味
雙全茶芳飄四季　　日日春風笑瞇瞇
歇睏五日過新年　　初六開市請準時

87年-虎

初一歇睏去拜拜　　初二歇睏請囝婿
初三歇睏樂開懷　　初四歇睏接神來
初五歇睏請期待　　初六開市好頭采
雙全祝恁大發財　　平安順利笑咍咍

88年-兔

聽講景氣有夠歹　　各行各業攏咧哀
業績卜好著勤快　　認真扑拼上實在
歇睏四日通人知　　多入幾罐冰箱內
茶芳清心助氣概　　初五開市準時來

89年-龍

紅茶好食大喙咻　　無煩無惱上清閒
一牽二運三才情　　感謝逐家鬥相拱
歇睏四日看風景　　初五開市一尾龍
祝恁前途放光明　　金銀財寶歸厝間

90年-蛇

景氣無好逐家哀　　勤儉扑拼才應該
期待冬去春閣來　　英雄再展好氣概
雙全店面新氣派　　茶芳味純袂凊採
歇睏四日報汝知　　加減囤寡卡實在
初五開市好頭彩　　士農工商發大財

91年-馬

一馬既出該當先　　一片錦繡在眼前
一杯紅茶食袂嬗　　一喙落喉若神仙
一蕊蓮花種心田　　一句好話結善緣
步步高升大發展　　平安富貴萬萬年

92年-羊

紅茶的芳味　是美妙的歌詩　咻會落喉　講袂出喙
紅茶的芳味　是遙遠的記智　愈老愈好　攏袂退時
紅茶的芳味　是歷史的堅持　感情的生理　愈做愈甜
馬年冬尾　卜共汝定一個美麗的約會
初五來坐
汝的笑容是羊年早春上嫷的花

93年-猴

用歷史來浸　用感情來濾
佇雙全　紅茶是
無聲的歌　無字的詩
恬恬啊飲　勻勻啊鼻
燒的　冷的
攏是人生的滋味
春風微微　希望發尹
人客啊　恁敢有聽見
因咧講--
初五開市　毋通袂記

94年-雞

有一款寂寞　號做堅持
有一款鄉愁　號做古早味
人客啊--
茶葉伸勻　叫醒滿山的茶香
阮用即甌茶　毛汝去淪歲月的磅孔
汝用十五箍　共阮交關
交關紅茶伯也五十冬的
映---望---

95年-狗

水愛滾茶　才會笑
泡茶　勿會使滾笑
人客啊--
茶的心情佇時間內發酵
撙節的學問
著用數十冬的青春來換
店有老　料嘛有實
賣茶　著愛老實
人客啊—
好茶毋爾卜止喙凋
堅持傳統才會稠辟
雙全的心意　毋是小可